आवाज़ ए हिमाचल
शाहपुर, 11 जुलाई। प्रकृति तित्थु ही है तियां ही है जिह्यां थी। सैह खेल बी तियां ही हन् जिह्यां खलोये थे, सैह खिलाड़ी भी कदी कदी तियां ही होई जांदे जिह्यां सैह खेले थे। एह लग गल्ल है कि भई ढांचें नौएं खड़ोई गे। मैं धर्मशाला जांदां तां कदी कदी ब्यॉयज स्कूले आल़ीया सड़का बी पेई जांदा। कालेजे दे मोड़े पर गेटे साह्मणे अरजने हेठ कृष्णे दे फादर साहब लुब्ब्दे गोल़ गफ्फेयां बेचदे गांह बिचला रस्ता जेहड़ा नाल़ुये उतरी स्कूलें पुज्जदा था। साह्मणे पंडत होरां दा टी स्टाल कनै दुय्ये पास्सैं सिग्गो दा छोलेयां दा खोखा ।
गेटे लुब्बदे मास्टर मस्टैणियां नज़र औंदे, पीटीआई सरदार साहब, समझाने पर कोई न समझे ता टह्से दैणे आल़े मैथ मास्टर कैलाश कटोच जी, इक्नोमिक्स दे डोगरा पैंजी, हिन्दीया दे कायस्था पैंजी कनै इंग्लिशा आल़े राहुले दे मम्मी मिसेज शर्मा जी ।
बरांडे च लगणे आल़ी ऊर्दुये दीया क्लासा बाद अद्धी छुट्टी होई जांदी थी , दसवीं दी फाह्ण प्लेटां पास्सैं दौड़दी थी ,तदूं प्लेटां च ही सारे खेल होंदे थे , कालेजे दे मुंडू बी जेहड़े जे बी टी दे उरां परां रैहन्दे थे सैह पढ़दे गुणदे नज़र औंदे थे।
तिस जमाने अपणीयां सीमा नीं कोई तोड़दा था कालेजे दा खेल बखरा, स्कूले दा खेल बखरा ,हां जदूं असां हिल्लणे बाद फुटबॉल छड्डी स्कूले दे बाड़े कनै कालेजे दे ग्राऊंडे बक्खें बणयो खप्पे च क्रिकेट लगी पे खेल़णा तां कालजेट बी आई रल़दे थे ।हौलैं होलैं असां बी कालेज ग्राऊंडे च पुज्जणा लगी पे। फिरी प्लेटां च बी क्रिकेट पुज्जी गेई ।
पहलैं प्लेटां च फुटबॉल ही होंदा था, सैह बी गुदड़ां दां। कोई न कोई बच्चा घरे ते गुदड़ां दा बणया, खंदुईया सुईया नै सीतेया फुटबाल लेई औंदा था ,खूब खेल चलदा था।
कई यादां न खेला दीयां महेशी बड़ा खलाची था, कुल्लू साह्न था ,गोच्छा, सकोहे आल़ा रमेश ,सनौरां आल़ा विशाल, हरदीप, विजय बी पस्तंगा लाई जांदे थे, राहुल(मनीटरे,) दी टीमा दे मुनीष ,खत्री ,अज्जू ,विजय ,घड़ा, बी.पी. थापा भी बड़े खलाचू थे , पर गग्गले आल़ा मैहता टैकल करी लैंदा था। गिल्लू (महादेवी दी कहाणी दा पात्र, असां इक्सी दा.नां रखी तेया था) रैफरी बणदा था ।
प्लेटां सत्त अठ्ठ थी यां। लग प्लैटां च लग कलासां दा खेल लगदा था, थल्लै ते होआ औंदी थी कि गोल़ मारी गे ता चीलगाड़ी आल़ा भुट्टो कनैं नरगोटे आल़े बिल्लुये दा रौल़ा पौंदा था।
गुदड़ां दा एह खेल दो की साल खूब चलया फिरी मैं भी रैता स्कूले आई रेहा, दवारा कालेज पढ़णा गेया ता दिख्खया तिथु प्रोफेसरां दे क्वाटर थे मैं जवाहर नगर रेहा या शान्तिस्वरूप अवस्थी होरां दे पुराणे घरे ता याद नीं कि भई गुदड़ां दा फुटबॉल फिरी खलोया होये, कई बरी ग्रां च बच्चे खेलदे लुब्बदे ता गुदड़ां दे फुटबॉल दी याद औंदी। गुदड़ां दे भी दो बाल होंदे इक फुटबॉल जेहड़ी के मैं बीतीयो सुणाई दुई छतरोड़िये दी गेंद ।
तुसां चक्करे च पेयो होणे भई एह प्लेटां क्या । इस बास्ते मैं एह क्रिकेट ग्राऊंडे दी फोटू लगाईयो कि भई एह ग्राऊंड प्लेटां पर बणया था प्रोफेसरां दे क्वाटर बी पुट्टी दित्ते थे। इस ज़मीना दा नां प्लेटां था, पता नीं प्लेटां नां कुन्नी कैंह रख्खया था?
इक होर याद जदूं असां गुदड़े दे फुटबॉल खेलदे थे तदूं इक बरी खेल अपणे पूरे जोरे पर था, तां दे, तां दे ,तां दे मार, गोल खूब रौल़ा पेया था तां बड़ा भारी हिल्लण होया था। ग्राऊंडे उपरें गुजरदियां तारां टुट्टियां कनै खम्बा ढेई गेया था, फाह्ण क्लासा पास्से नह्सी सैह बी कमरे जो, कमरे दी सीलिंग भी ट्टटी गई थी, हिस्टीरिया आल़े बासमती पैंजी पर बी गर्दा पेया था, नठ्ठी बचे थे। स्कूले छुट्टीया दी घंटी बजी गई थी, सब घरां जो नह्से थे, मैं भी झोल़े समेत नेरटिया घरैं आई पुज्जा था तदयाड़ी रेडियो स्टेशने दे वक्खे क्वाटरे च कह्ले रैहणे दी हिम्मत नीं होई थी।
